Leonardo Fernández

"O Leo" xa posa co micrófono de "A Nosa Liga"! Catro reporteiros, catro perfiles diferentes para ANL.

Inma Morandeira

A coruñesa Inma Morandeira incopórase ao plantel de "A Nosa Liga":

Matías Tarrío

O turno da sesión fotográfica de Matías Tarrío. O que fora o "O Cazador de Palabras" da TVG, agora co micrófono de "A Nosa Liga". 

Moncho Blackfire

Hoxe con Moncho Blackfire sacando unhas fotiños para o dossier do proxecto:

Unhas palabras dende a bancada...

Unhas palabras dende a bancada...

“Ei, pero esa camiseta de que equipo é?”, díxome un compañeiro da escola xusto antes de comezar o partidiño do recreo. Eu levaba a camisola de José Antonio, que era o porteiro do equipo da miña vila: o Sigüeiro Fútbol Club. Evidentemente, aquela camisola non ma tiña regalado o propio José Antonio ao rematar un encontro, nin a mercara na tenda oficial do club; era unha camisola de manga longa con codeiras que fora mercada nunha tenda de deportes de Ordes, a semana anterior, e á que a miña nai se encargara de coserlle un escudo do Sigüeiro que lle arrancaramos a unha das vellas equipaxes que o presidente aínda gardaba no soto da súa casa. Non era unha camisola de última moda, era unha camisola caseira, e que? O sorriso non me collía na cara cada vez que a vestía, era a camisola do equipo dos meus amores… Os rapaces da escola levaban a camisola do Madrid, a do Barça, a do Celta ou a do Dépor e eu ía ataviado coa do equipo da miña vila, sen ningún tipo de complexo, porque entendía que o fútbol é ás veces un sentimento e que para min non dependía dos millóns de pesetas que cada club tivera na conta corrente do banco.

Aquel neno non sabía cal era o equipo daquela camisa e eu non acreditaba. Non comprendía coma vivindo na mesma vila e gustándolle o fútbol, non podía terlle o mesmo cariño que lle eu tiña a aquel escudo…

Tamén me lembro do día que lle ensinei aquela camisola ao propio José Antonio; facíalle máis ilusión a el que a levara posta que a min. E é que isto vai de ilusión, da ilusión por substituír as moreas de cartos por esforzo e traballo, para que cada recuncho do noso país poida gozar do fútbol máis modesto, do fútbol máis noso.

Co paso dos anos fun coñecendo a moita xente deste mundiño e pouco a pouco dinme conta de que o amor que lle teño eu ao Sigüeiro FC é o mesmo que lle ten David ao Tordoia, Manu ao Villestro ou Fernando ao Calo… É que isto move a milleiros de persoas e é un espello do que somos; por iso nace “A Nosa Liga”, coma reflexo de nós mesmos.

Perico Balado.

Afeccionado ao fútbol rexional.